Lea 4

Kaveinga: Ko e visone mo e palani langa fakalakalaka faka-ako ‘a e SUTT pea mo hono teu’i ‘ene kau fakamo’oni ma’a Sisu Kalaisi ke makatu’unga ‘i he fakahinohino mo e tataki ‘a e folofola’ pea mo e Laumälie Mä‘oni’oni. {1 Kol 3:10-12; Sione 16:13-14; Matiu 7:24-25; Ma’ake 13:31}

1. Fakatapu mo e talamonu

2. ‘Oku ou tömu’a kole fakamolemole atu, he ko e finemotu’a kita ia ‘oku fakakaungatämaki he potungäue ako ‘a e Pule’anga’ pea ‘oku ‘ikai ha’a ku taukei ki he ngaahi visone mo e palani fakalakalaka faka-ako ‘a e SUTT. Pea ‘oku ou fakakaukau ‘e lelei ange ke ‘oua na’a ku taki hala’i kimoutolu ‘aki ha fakamatala ta’etotonu, ka u nofo pë ke lea ‘i he kaveinga kuo ‘omi ‘i he vahevahe’.

Ka neongo ia’, ‘oku ou faingata’a’ia ‘i he kaveinga kuo ‘omi he ko hono mo’oni ko e kaveinga ia ke lotua kae ‘ikai ko ha kaveinga ke fai ai ha lea. ‘Oku faka’amu e kaveinga’ ke makatu’unga ‘a e visone mo e palani langa fakalakalaka fakaako ‘a e SUTT ‘i he fakahinohino mo e tataki ‘a e folofola’ pea mo e LM. Ko ia ‘i he ma’u pë ‘a e vahevahe’ na’a ku hüfia ke tokoni mai ‘a e LM ‘o tataki ‘a e visone ‘oku fai ‘e he Potungäue Ako ke hoa mo e folofola. Pea ‘oku ou fokotu’u atu ke mou tokoni mai, ‘aki ‘i hono fakakau ‘i ho’omou ngaahi lotu fakafämili ‘a hono hüfia ‘o e kaveinga ni. Tau hüfia kotoa ke tokoni mai ‘a e ‘Otua ‘o fakamävana ‘a e ngaahi visone ‘oku fai ‘e he Potungäue Ako, koe’uhi ke hoko ‘a ‘etau fänau ko e kau fakamo’oni lelei ma’a Sisü ‘o makatu’unga ‘i he fakahinohino mo e tataki ‘a e folofola’ pea mo e LM. ‘Oku lau ki ai ‘a Paula ‘ia 1 Kolinitö 3:11 ‘ He ko e me’a ki he makatu’unga’, tala’ehai ‘e lava ‘e ha taha ke ‘ai mo ha tu’unga kehe, ka ko ia pë ne toka ‘ai, ‘a ia ko Sisü Kalaisi. Ke tau kautaha ‘i hono hüfia ke fai ‘a e langa fakalakalaka ‘a e Potungäue Ako’ ‘i he makatu’unga ko ia’.

Ko e fakahoha’a ‘i he efiafi ni te u tokanga atu ai ki ha ngaahi fakakaukau ma’ama’a ‘e tolu ‘a ia ‘oku lava ke unu mei he’eku kaveinga’. (1) Ko e mahu’inga ke akonekina ‘etau fänau ‘i he’etau ngaahi ako’anga’ ke nau hoko ko e kau fakamo’oni ma’a Sisü Kalaisi. (2) Ko e ngaahi faka’ilonga ‘oku tataki ‘e he folofola’ mo e LM ‘a e palani fakalakalaka ‘a e Potungäue Ako’. (3) Ko e mahu’inga ke ‘i ai ha visone ma’a e kaha’u ‘o e ako’ mo ‘etau fänau’.

3. Ko e ‘uluaki’, ko e mahu’inga ke akonekina ‘etau fänau ‘i he’etau ngaahi ako’anga’ ke nau hoko ko e kau fakamo’oni ma’a Sisü Kalaisi. Ko e anga maheni’ foki, ‘oku tau fakakaukau ko e ngaahi ako’anga’ ‘oku ako’i ai ‘a e ngaahi me’a faka’atamai pë kae tuku hono teu’i ‘o e kau fakamo’oni ma’a Sisü ki he Lautohi FakaSapate pea mo e Akolotu’. ‘Oku ‘ikai pehë e kaveinga ngäue ia ‘a e Potungäue Ako’ ‘a e SUTT ‘a ia ‘oku tokanga ki hono teu’i e tangata mo e fefine kakato ‘o hangë ko e ‘uluaki kaveinga lea’. ‘Oku ‘ikai ke ngata pë ‘i hono teu’i ‘o e ‘atamai, ka ‘oku toe tokanga foki ke fafanga ‘a e loto’ ‘aki ‘a e ngaahi tö‘onga fe’unga. Ko e teuteu ko eni ‘oku kamata pë mei ‘api, ‘o hangë ko ia ne tokanga ki ai ‘a e kaveinga lea hono ua’.

‘Oku ou faka’amu ke tanaki atu ‘i he fakahoha’a ni ‘ ko e akonekina ‘o e fänau ke hoko ko e kau fakamo’oni ma’a Sisü’, ko e fatongia fakaako mo ia. ‘Oku mou mea’i pë, na’e fa’a ui ‘a Sisü ko e "Lapai" ‘a ia ko e fo’ilea ia ‘oku ‘uhinga ko e "faiako." Pea ko e toko hongofulu-mä-ua na’e muimui ofi kiate ia, ‘oku ‘iloa kinautolu ko e "kau akonga." Kapau ko ia, pea tä ko kinautolu ‘oku nau hoko ko e kau fakamo’oni ma’a Sisü ko e kau akonga mo kinautolu! Pea ‘oku ou fakakaukau ko e tu’unga lelei ke a’u ki ai ‘etau fänau ka nau ka hoko ko e kau akonga pe kau muimui ‘o Sisü. ‘Aki ‘a e ‘uhinga ko eni:

Ko e me’a lelei ke nau hoko ko e kau akonga he ‘oku o’i ai kinautolu ke mo’ui fakaongoongo ki ha tokotaha kehe. ‘E ‘ikai te nau mo’ui fakamofutofuta pe aafe ke fai fakaehaua, he ‘oku ‘i ai hanau taki ‘a ia ‘oku nau fakaongo ki ai. ‘Oku mou mea’i pë e fänau ‘oku ‘ikai o’i ke muimui ki ha taha, ‘oku nau tutupu hake ‘o hoko ko e tamaiki fakavalevale. Ko e fänau ‘oku poto he muimui’ te nau tupu hake ko e kau taki lelei! Pea ‘oku ou lelei’ia au ‘i he tö‘onga ‘a Sisü, ke u pehë ai ‘oku lelei ke akonekina ‘etau fänau ke nau muimui kiate ia. Ko e founga ia te nau hoko ai ko e kau taki lelei ‘i he kaha’u’ ‘i hotau fonua ni!

4. Ko hono ua’, ko e ngaahi faka’ilonga ‘oku taki ‘e he folofola’ mo e LM ‘a e palani fakalakalaka ‘a e Potungäue Ako’. ‘Oku mahino mei he Tohitapu ko e tefito’i ngäue ‘a e ‘Otua ‘oku fai ko hono fakamanavahake ‘a e kakai ‘oku faingata’a’ia, pea mo fakakakato ‘a kinautolu ‘oku nau fusimo’omo. ‘Oku ou faka’amu ‘oku pehë ‘a e ngaahi palani fakalakalaka ‘a e Potungäue Ako’ ‘ ‘oku nau tokangaekina ‘a e masiva mo e tu’utämaki’, pea tokoni ke lava ‘e he’etau fänau’ ‘o tali ‘a honau ngaahi fakangatangata’.

Ko e kuohili’ foki, na’e tokanga ange ‘a e ngaahi ako’anga’ ki he langa fakalakalaka ‘aki ‘a hono langa ‘o e ngaahi fale mo tö ‘a e ngaahi ‘ä. Ka ‘oku ou fokotu’u atu ke tefito ‘a e langa fakalakalaka’ ‘i he fänau ako’, pea ke kau ki ai hono tokoni’i kinautolu ke nau ‘ilo honau ngaahi fakangatangata’. ‘Oku tu’unga ‘eku fokotu’u pehë he ‘oku tolonga ange pea fua lelei ange ‘a e langa ‘oku fai’ ‘okapau ‘oku ‘ilo’i ‘a e ngaahi mata-vaivai’. Ko e langa ‘e tolonga ‘oku ne monomono ‘a e ngaahi maumau kimu’a pea toki hiki ‘a e fale ki ‘olunga. Hangë pë ko e faito’o mahaki’ ‘ ‘e ‘ikai ‘aonga ‘a e fo’i’akau kauti ia ki ha taha mahaki hela. Tukukehe ‘okapau ‘oku fakatou mo’ua ‘a e tokotaha mahaki ‘i he ongo fokoutua. ‘Oku ou faka’amu ‘e pehë ‘a e visone ‘a e Potungäue Ako’ ‘ ke ‘ilo ‘a e ngaahi fakangatangata ‘o e fänau pea tu’unga ai ‘a e langa ki he kaha’u’. Ka pehë, ‘e tolonga ‘a e langa ‘oku fai. ‘Ikai ia ko ia pë ka ‘e hoko ‘a e ngaahi palani ‘a e potungäue’ ke fakamänavahake mo fakakakato ‘a e mo’ui ‘a e fänau ‘o hangë ko e kaveinga ngäue ‘a e ‘Otua’.

5. Ko hono faka’osi’, ko e mahu’inga ke ‘i ai ha visone ma’a e kaha’u ‘o e ako’ mo ‘etau fänau’. Ko e visone ko e faka’ilonga ia ‘o e ‘amanaki mo e fakatu’amelie. Kapau leva ‘oku ‘i ai ha’atau visone ma’a ‘etau fänau’, ko e fakamahino ia ‘oku ‘i ai ‘etau ‘amanaki lelei ki hanau kaha’u. ‘Oku mahu’inga ke ‘i ai ha’atau visone ma’a kinautolu’, he ko kinautolu ‘a ‘etau ‘amanaki ki he kaha’u’. Ko ‘etau fänau’ ko hotau fakatu’amelie’anga, pea ‘oku mahu’inga ke tau akonekina kinautolu koe’uhi ke nau hanga ‘o fakakoloa kitautolu ‘i he kaha’u’.

Ko e kakai ‘oku ‘ikai ha’anau fakatu’amelie’, ‘oku nau fakapapae pë ‘o fakaongoongo ki he me’a ‘oku fokotu’u mai ‘e he kakai kehe’. ‘Oku ‘ikai ko ha faka’ilonga ia ‘o e matu’otu’a mo e konisenisi mo’ui. ‘Oku kei mahu’inga ke ‘i ai ha fakatu’amelie, pea ke tau kautaha ‘i hono poupou’i ‘a e ngaahi visone mo’ui ‘a ë ‘oku hoa mo e finangalo ‘o e ‘Otua.

Ka ko e fakatokanga eni: ke tau fai fakapotopoto ‘i hono fafanga ‘etau fänau ‘aki ‘a e ngaahi visone mo e ngaahi ‘amanaki. He ‘oku ‘i ai foki ‘a e ngaahi visone ia ni’ihi ‘oku fakatu’u-tämaki. Kuo kamata ke hä ‘a e ngaahi visone pehë hotau fonua ni. Na’e faka’atä ke fai ‘a e ngaohi pia mo e kava mälohi, koe’uhi ko e visone fakaekonomika. Ka kuo tokolahi fau hono fai vale’i ‘o e konä he ngaahi ‘aho ni. Ko e visone ia ‘oku fakatu’utämaki.

‘Oku ‘ikai ko e fa’ahinga visone ia ‘oku fe’unga mo ‘etau fänau. ‘Oku totonu pë ke hä mai mei he ngaahi visone ‘a e Potungäue Ako’ ‘a e kaveinga ‘a e ‘Otua ke fakamanavahake mo tokonia ‘a e kau masiva’, pea ke tau kau kotoa ki hono fakatupulekina ‘o e kaveinga ko ia ‘i he’etau fänau’.

6. Fakamä‘opo’opo!

‘Ofa atu.